له‌په‌راوێزی كۆبونه‌وه‌ی نێوان یه‌كێتی هاورده‌ و ناردنكارانی هه‌رێمی كوردستان و مه‌ڵبه‌ندی گشتی هاورده‌ و ناردنكارانی یه‌كێتی گشتی ژووره‌ بازرگانیه‌كانی كۆماری میسری عه‌ره‌بی ، پرۆتۆكۆلێكی بازرگانی هاوبه‌ش واژووكرا .
له‌وباره‌یه‌وه‌ سه‌ید عه‌لی دقله‌ ئه‌ندامی ئه‌نجومه‌نی كارگێری مه‌ڵبه‌ندی گشتی هاورده‌ و ناردنكارانی یه‌كێتی گشتی ژووره‌ بازرگانیه‌كانی كۆماری میسری عه‌ره‌بی ئاماژه‌ی به‌وه‌دا كه‌ دوابه‌دوای سه‌ردانه‌كه‌ی به‌رێز مه‌سعود بارزانی سه‌رۆكی هه‌رێمی كوردستان بۆ كۆماری میسری عه‌ره‌بی كرانه‌وه‌یه‌كی به‌هێزتر باڵی كێشا به‌سه‌ر په‌یوه‌ندیه‌ سیاسی و بازرگانی و ئابوری و كۆمه‌ڵایه‌تیه‌كانی وڵاتی میسرو هه‌رێمی كوردستاندا ، هاتنی ئێمه‌ش به‌شێكه‌ له‌و راسپاردانه‌".
سه‌ید عه‌لی وتیشی :"كۆبونه‌وه‌كه‌ی نێوان هه‌ردوولا و واژووكردنی ئه‌و پرۆتۆكۆله‌ گرنگه‌ هه‌نگاوێكه‌ به‌ره‌و به‌هێزكردنی په‌یوه‌ندیه‌ بازرگانیه‌كانی نێوان یه‌كێتی هاورده‌ و ناردنكارانی هه‌رێمی كوردستان و كۆماری میسری عه‌ره‌بی " .
هاوكات شێخ مسته‌فا عه‌بدولره‌حمان سه‌رۆكی یه‌كێتی هاورده‌ و ناردنكارانی هه‌رێمی كوردستان تیشكی خسته‌ سه‌ر ناوه‌رۆكی كۆبونه‌وه‌كه‌ و رونیكرده‌وه‌ كه‌ له‌ كۆبونه‌وه‌كه‌دا باس له‌ ره‌وشی هه‌رێمی كوردستان و ئه‌و پێشكه‌وتنه‌ به‌ر چاوه‌ كرا كه‌ له‌ رووی ئابوریه‌وه‌ هه‌رێمی كوردستان به‌ خۆیه‌وه‌ بینیویه‌تی و داواكرا كه‌ كۆمپانیا میسریه‌كان هانبدرێن بۆ ئه‌وه‌ی سه‌رمایه‌كانیان له‌ كوردستاندا بخه‌نه‌ گه‌ر" .
له‌ كۆتایی كۆبونه‌وه‌كه‌شدا له‌لایه‌ن سه‌رۆكی یه‌كێتی هاورده‌ و ناردنكارانی هه‌رێمی كوردستانه‌وه‌ رێز له‌ سه‌ید عه‌لی دقله‌ گیرا و لۆگۆی یه‌كێتی هاورده‌ و ناردنكارانی پێشكه‌شكرا .