لە چەند ڕۆژى ڕابردوودا شاندى بازرگانیى هۆڵەندا سەردانى هەرێمى كوردستانیان كرد بۆ مەبەستى كردنەوەى نووسینگەیان لە هەرێمى كوردستان و ئەنجامدانى كارى وەبەرهێنان، سەرۆكى ئەو شاندە پێى وایە هەرێمى كوردستان جێگەیەكى گونجاوە بۆ وەبەرهێنان.

شاندى بازرگانیى هۆڵەندا پێك هاتووە لە 20 خاوەن كۆمپانیاى هۆڵەندایى و لەسەر بانگهێشتنى سەرۆكى یەكەتیى هاوردن و ناردنكارانى كوردستان سەردانى هەرێمى كوردستانیان كردووە و لەگەڵ سەرمایەداران و بازرگانانى هەرێمى كوردستان كۆ بوونەوە.

لەوبارەیەوە شيخ مستەفا عەبدوڕەحمان سەرۆكى یەكەتیى هاوردن و ناردنكارانى كوردستان بەئاژانسى كوردستان  ڕايگەیاند لەگەڵ كۆمپانیا هۆڵەندایییەكاندا هەوڵى پتەوكردنى پێوەندییە بازرگانییەكان دەدەین بۆ ئەوەى نووسینگەیان لە هەرێمى كوردستاندا بكەنەوە، ئەوەش لەپێناوى گەشەسەندنى ژێرخانى ئابووریى هەرێمى كوردستان و سوودوەرگرتن لە ئەزموونى كاركردنى كۆمپانیا هۆڵەندایییەكان.

لاى خۆیەوە ڤاند ڕاخەر سەرۆكى شاندى بازرگانیى هۆڵەندا  گوتى هەرێمى كوردستان جێگەیەكى گونجاوە بۆ ئەنجامدانى وەبەرهێنان.

هەروەها گوتى هەوڵ دەدەین كۆمپانیا هۆڵەندایییەكان بهێنینە هەرێمى كوردستان، جەختیشى كردەوە لەسەر دروستكردنى ڕایەڵێكى بەهێزى بازرگانى لە نێوان كۆمپانیا هۆڵەندایییەكان و كۆمپانیاكانى هەرێمى كوردستاندا.

 ئەو شاندە بازرگانییەى هۆڵەندا لە سلێمانى كۆنگرەیەكى ڕۆژنامەوانییان ئەنجام دا و تێیدا خۆشحاڵیى خۆیان دووپات كردەوە بۆ ئەنجامدانى كارى بازرگانى و وەبەرهێنان لە هەرێمى كوردستاندا.